A Xunta destinará máis de 520.000 euros para que os concellos de Monforte, Sober, Sarria e Quiroga realicen accións de rehabilitación integral dos seus edificios, sobre todo, aqueles que están en zonas patrimoniais, cascos antigos ou rurais.

Así, en Monforte de Lemos haberá actuacións no seu conxunto histórico por valor de 186.159,37 euros. En Quiroga as axudas superarán os 200.000 euros para rexenerar o seu núcleo urbano, mentres que na zona antiga de Sarria serán case 40.000 euros e nas zonas rurais de Sober de 109.000 euros.

O Consello da Xunta de Galicia aprobou este xoves a sinatura de 54 convenios de colaboración entre o IGVS e 35 concellos galegos para o desenvolvemento destas accións en diversas áreas de rehabilitación integral. O importe global da totalidade dos convenios ascende a case 18 millóns de euros.

Gastos financiables

As actuacións en áreas de rehabilitación integral teñen por obxecto o financiamento da execución conxunta de obras de rehabilitación en edificios e vivendas, incluídas as vivendas unifamiliares. Tamén a execución de obras de urbanización e reurbanización de espazos públicos e de obras de demolición e edificación de vivendas de nova construción.

Por outra banda, tamén haberá axudas para o custo do realoxo temporal de ocupantes da súa vivenda habitual, froito das actuacións que se realizan e para os gastos de mantemento de equipos técnicos e oficinas de información e xestión municipais.

Unha vez asinados os convenios cos correspondentes concellos, serán estes os encargados de realizar a convocatoria para que os propietarios de vivendas e edificios de vivendas interesados nelas poidan solicitalas. No caso de concellos nos que existe máis dunha área de rehabilitación, a repartición de fondos entre eles foi realizado polo propios concellos.