O alumnado do CEIP de Quiroga vén de divulgar un interesante traballo que realizaron durante este curso a través do ‘Proxecto Terra’ e do ‘Proxecto Documental Integrado’. Trátase dun xogo de mesa bautizado como “O xogo do Meco” que axuda a coñecer “un territorio con moita Historia”.

“Este curso aprendemos moito da nosa contorna, das edificacións que albergaron a historia da nosa zona, os costumes ou o hábitat a través das épocas…”, comentan dende o centro escolar quirogués.

Todo o que aprenderon sobre a súa contorna plasmárono nun xogo de mesa “ao máis puro estilo do Xogo da Oca e cun protagonista moi especial: o Meco”. O taboleiro leva aos xogadores e xogadoras polos lugares e protagonistas máis destacados do Xeoparque ao longo da Historia.

O XOGO DO MECO

O ‘Xogo do Meco‘ realizouse en dúas modalidades: unha elaborada polo alumnado de infantil ata terceiro de educación primaria, e outra elaborada pola rapazada de cuarto a sexto.

Pódense descargar os taboleiros na páxina web do CEIP de Quiroga, e tamén acceder aos dous taboleiros virtuais e xogar unha partida se se desexa.

Taboleiro en liña dos pequenos, e taboleiro en liña dos maiores.