A Mostra de Mel de Quiroga cumpre este ano 33 edicións e faino coa presenza de 7 apicultores/as, feito que indica que a cousa non vai a menos.

Este 2024 terán posto os seguintes produtores de mel: Manuel Macía González, das Estradas; Mª Carmen Macía Fernández, de Quiroga; Ángel Gómez Martínez, de Paradapiñol, Manuel Rodríguez Fernández, de Centeais; Pedro Soto Losada, do Ivedo; Caurelor, de Quiroga; e Iván Losada Machado, de San Xulián de Abaixo.

Falamos coa apicultora María Carmen Macía.

Dende cando fas mel?

É unha tradición familiar. Comezou meu pai, Manuel Macía, que foi un dos que estiveron na primeira Mostra de Mel de Quiroga. E dende hai 7 ou 8 anos xa me estou facendo cargo eu coa axuda do meu home, Javier Mondelo.

Onde tedes as colmeas?

Temos dous asentamentos en Montefurado e un en Fisteus. En total unhas 9 colmeas.

De que flores se alimentan as abellas?

O noso mel e multifloral. As de Montefurado aliméntanse basicamente de brezo, árbores froitais, silvas… E as de Fisteus tamén de brezo, silvas e ademais castiñeiro.

Un produto final sen aditivos, entendo?

Este mel non leva nada, ningún aditivo. E ás abellas, ao acabar de castrar fáiselle o tratamento da barroa, o único que se lles dá, autorizado e que non afecta ao produto final.

Que produción tedes, logo?

A nosa produción é pequena. Facemos para abastecer a moita clientela recorrente de cada ano e para levar a algunha mostra como a de Quiroga que sempre está no calendario. Este ano, ademais, estivemos na Festa da Cereixa de San Clodio onde levamos tamén produtos derivados do mel como xabóns, candeas…

Canto mel levades mañá á Mostra de Quiroga?

Pensamos levar uns 60-70 quilos. Non saquei todo o mel porque non estaba todo operculado e despois de festas mirarei se xa se pode sacar o que falta.

Que significa “operculado”?

É como un sellado de cera que lle poñen as abellas ao panel. Se non está operculado non se pode sacar porque pode ter humidade e pódese estragar.

Como valoras a produción deste ano?

Este ano a colleita que estou vendo é boa. Eu menos que o ano pasado non teño.

Como levades a ameaza da velutina?

Polo de agora está atacando menos. Aínda pode vir, pero de momento salvamos…

Como notas o mel deste ano?

Doce en xeral e non tan escuro como outros anos.

Valoración da Mostra do Mel de Quiroga destes anos e algunha suxestión para mellorala?

Non se me ocorre nada… unha cata quizais… Ao durar só unha mañá igual non hai marxe para moito máis.