O alcalde de Quiroga, José Luis Rivera, valora que “mellorou moito a situación” do incendio nas últimas horas tras o desaloxo temporal de media ducia de veciños na tarde do pasado mércores durante a Situación 2 por perigo para os núcleos de Casa do Vello, As Barxas e Penas Rubias, xa desactivada durante a propia noite do 16 de setembro.

En declaracións a Europa Press, o rexedor considera que o lume “xa está estabilizado tecnicamente esta mañá”, aínda que falta aínda a confirmación oficial da Xunta. Con todo, chama a agardar a ver como evoluciona a xornada. O incendio iniciado o pasado martes na montaña de Quiroga, en Pacios da Serra, arrasa 360 hectáreas segundo a última actualización da Consellería do Medio Rural. Múltiples medios aéreos e terrestres, incluído o apoio de aeronaves do Goberno, traballaron na zona durante estes días.

Polo de agora, apunta que esta mañá está “bastante tranquila”, xa que hai menos vento, o que complicou a situación na tarde do pasado mércores e levou a activar a Situación 2 por precaución para as vivendas. Explica que este xoves céntranse en labores de limpeza e en humedecer o terreo. En relación coas causas do lume, pide agardar á investigación, despois de que o incendio se declarase nunha zona na que “case non hai accesibilidade”.