Dúas persoas, un home e unha muller, foron trasladadas a un centro médico na noite deste martes ao presentar síntomas por unha posible intoxicación de monóxido de carbono procedente da defectuosa combustión dun quentador nunha vivenda en Sarria.

Segundo informou o 112 Galicia, os feitos sucederon sobre as 20,00 horas deste martes á altura do número 158 da rúa de Calvo Sotelo, en Sarria.

Urxencias Sanitarias de Galicia-061 alertou ao 112 Galicia do escape de gas, tras o que o CIAE 112 Galicia puxo a situación en coñecemento dos Bombeiros de Sarria, da Policía Local e da empresa subministradora do gas.

Unha vez na vivenda, os servizos de emerxencia levaron a cabo as comprobacións correspondentes, que confirmaron a presenza de monóxido de carbono. A partir de aí procederon a ventilar a casa.

O 061 desprazou unha ambulancia de soporte vital básico que levou ás dúas persoas, un home de 44 anos e unha muller duns 48, ao centro de Atención Primaria de Sarria, confirmaron fontes sanitarias.