A Consellería de Educación podería rematar ante os tribunais pola “lamentable” situación do Colexio Frei Luis de Granada de Sarria. Así o considera un dos portavoces da plataforma en defensa deste centro, Javier Pico, que cre que é a única opción para “defender a seguridade” dos seus fillos.
O centro, denuncian os pais, presenta problemas na estrutura do edificio, que se decidiu apontoar. Agora, a consellería “quere enviar aos alumnos de cuarto, quinto e sexto ao instituto de Sarria e demoler unha parede da Escola Fogar que é onde queren situar aos máis pequenos”, afirma o colectivo. De feito, a catro días do inicio do curso, non hai aínda licenza, nin notificación previa ao comezo da actividade.
“Hai moitísimos pais que a data de hoxe están a tentar cambiar aos seus fillos de colexio e unha situación que ata este ano era un trámite pola consellería, naqueles centros nos que había prazas libres, este ano estase convertendo nunha auténtica odisea”, apunta PIco para xustificar a iniciativa dun grupo de pais.
“Ademais, a primeira resposta que che dan é que non o van a conceder (o cambio de centro). Isto chama a atención porque non leron nin sequera os informes, nin as solicitudes, que presentamos”, engade.
O portavoz dos pais afectados afirmou que perseverarán na “presión para que se solucione”. “Porque os nosos fillos non poden ir a un colexio que non cumpre as condicións mínimas esixibles”, critica. Por iso, unha vez que teñan “toda a documentación”, así como constancia de que a ten a consellería, afirmou que están “dispostos a ir á xustiza única e exclusivamente para defender a seguridade dos pequenos“.