A Escola de Educación Infantil de Sarria conmemorou o Día Internacional da Eliminación da Violencia contra a muller gravando un simpático vídeo no que pequenas e pequenos son as/os auténticos protagonistas.

Na peza audiovisual, baixo o título de “A escola dos superpoderes”, amósannos diferentes ‘superpoderes’ que nos poden axudar a eliminar as violencias e alcanzar un mundo mellor.

O vídeo remata cun desexo común “Xuntas acabaremos coas violencias, únete co teu superpoder”.

E falando de superpoderes, preguntámoslle a Iván Tourón, o director da escola, como levan o curso. “De momento todo vai ben, fomos tendo sorte e mantemos o virus á raia”, dinos contento por ser un dos centros educativos que non tiveron ningún susto ata o de agora e lembrando que as nenas e os nenos estanse portando moi ben, “a verdade é que os adultos deberiamos copiar deles…” sentencia. Velaquí outro superpoder para sumar no vindeiro vídeo que fagan…