O alcalde de Sarria (Lugo), Claudio Garrido, apuntou o “reto” de volver presentarse ás eleccións municipais do próximo ano baixo o paraugas das siglas de independentes ‘Camiña Sarria’.

Segundo explicou, trátase dunha decisión que valora tras conseguir sacar adiante os orzamentos do Concello despois de sete anos prorrogados e que ascenden a máis de doce millóns de euros.

Garrido, interpelado sobre as súas intencións de volver presentarse, confesou que “é un reto”. “Sempre vivín no fío, tentei afrontar nos mandatos que tiven a aprobación do Plan Xeral de Ordenación Municipal sen conseguilo e a consecuencia é que en pleno século XXI, no ano 2022, temos un plan do ano 1980″, afirmou nun exercicio de autocrítica.

Nesta liña, argumentou que “isto pon de manifesto a necesidade dunha política de continuidade para consolidar servizos” no Concello sarrián. Sobre os orzamentos aprobados en pleno lembrou que “Sarria levaba sete anos” coas contas prorrogadas, que “facía que o Concello se xestionase cun atraso de entre ano e medio e dous anos no pago a provedores e viviamos unha realidade económica ficticia e funcionábase só con remanentes”. Tamén insistiu en que “non se puido facer nestes dous anos, polo que era o límite da regra do gasto que finalmente eliminou o Goberno central pola pandemia”.

Ademais o alcalde de Sarria puxo o acento en que desde 2015 “non se actualizou ningunha taxa e ningún imposto polo que o déficit no concello era moi importante, sobre un millón e medio de euros”. Ademais, quixo “desmentir” á oposición que o acusa de subir impostos, e asegura que “este goberno non subiu os impostos, senón que o que se fixo foi actualizar ao IPC as taxas de saneamento, abastecemento e recollida de lixo”.

O alcalde asume esta terceira etapa baixo as siglas de ‘Camiña Sarria’ tras encabezar a lista do PSOE no ano 99 e en 2007. No exercicio 2019 abandonou o partido socialista.