Sarria prepárase para unha finde de música ‘espectacular’

De venres a sábado terá lugar ‘A Verbena’ cun selecto e amplo cartel de bandas do panorama galego e nacional e tamén actuarán Roi Casal na Praza da Vila e ‘Dous bos’ onde a igrexa de Santa Mariña.

Coolflanders, banda de Monforte. Foto cedida.

O establecemento sarriao O Meigallo e a asociación SonVerbam teñen xa todo listo para unha nova edición do ‘Verbena Fest’, evento local que estivo estes anos interrompido por mor da pandemia.

Este ano volve con forza e cun formato no que haberá concertos de balde e concertos de pago para sacar adiante o custe económico dalgunha das bandas participantes.

O venres 15 ás 21:00 h. comeza a festa, neste caso con actuacións gratuítas dos grupos Coolflanders, chegado dende Monforte, e Le temps du Loup dende Madrid. Para rematar pinchará o DJ local Lois.

Chegando ao sábado 16, haberá xa unha sesión vermú pola mañá a cargo de Anarchiks –ás 13:00 h. no Malecón– e de Mad Mission –ás 14:00 h. no Meigallo–.

O prato forte chegará á noite coa presenza dos grupos Belako, que chega dende Euskadi, Sex Museum, dende Madrid, Sexy Zebras, banda local, Fonkid, El Chico López e Jardín de la Croix que poñerán a guinda a unha espectacular fin de semana de música indei, pop, rock.

ROI CASAL  

O recoñecido músico pontevedrés chegará a Sarria este sábado 16 para ofrecer o concerto ‘Músicas no Camiño’ na Praza da Vila ás 22:30 h. A entrada será de balde e o espectáculo forma parte do ciclo de concertos do Xacobeo 2022-23, ciclo no que estiveron días atrás xa Guadi Galego e De Vacas.

Roi Casal foi integrante da mítica banda galega Milladoiro entre os anos 2000 e 2009 e os seus traballos en solitario foron aclamados por crítica e público sendo número 1 en vendas. Casal é un virtuoso coa arpa céltica e a zanfona, instrumentos milenarios do noso país e a súa música utilizouse como banda sonora para producións cinematográficas e de TV en distintos países.

AS TARDIÑAS DE SANTA MARIÑA

O domingo 17 ás 19:30 h. un novo concerto poñerá música ao Camiño Francés onde a igrexa de Santa Mariña. Nesta ocasión será a formación ‘Dous bos’, os encargados de amenizar a velada con ritmos de blues e rockandroll.

Foto do seu Facebook (Dous Bos)

DEIXAR UN COMENTARIO

Please enter your comment!
Please enter your name here