Co gallo do 25N, o Concello de Sarria convida a unha interesante charla con posterior coloquio na que se abordará o tema da violencia de xénero dende o traballo que realiza a Garda Civil e profesionais do ámbito da xustiza.

O acto, baixo o título “Profesionais ao servizo da convivencia sen violencia”, terá lugar o mércores 23 de novembro a partir das 19:00 h. no Salón de Actos da Casa da Cultura de Sarria. A presentación, ás 19:15 h., correrá a cargo da concelleira de Muller e Igualdade, Mª Eugenia Valcárcel López, e do Alcalde Claudio M. Garrido Martínez.

A continuación, ás 19:30 h., comezará a charla a cargo dos catro relatores que participan na mesma. Por un lado estarán Javier Hernández e José Ramón Boo, gardas Civís pertencentes ao Equipo de Violencia de Xénero da Compañía de Monforte de Lemos; e polo outro interveñen Covadonga González López, letrada do ICA de Lugo, colexiada exercente do Colexio de Avogados de Lugo e adscrita ao turno de Violencia de Xénero, así como tamén Sergio Orduña Alonso, Maxistrado-Xuíz titular do Xulgado de Violencia de Xénero de Lugo.

Rematadas as súas ponencias abrirase un coloquio entre as e os asistentes.