O sindicato CIG denunciou este venres as informacións de “extrema gravidade” trasladadas desde o Concello de Sarria sobre a contratación por parte do edil Benjamín Escontrela dun detective privado para “espiar” ás traballadoras da residencia municipal de Nosa Señora do Carme que se atopaban en situación de baixa laboral.
“Entendemos que o cesamento de Benjamín Escontrela á fronte da residencia municipal da Nosa Señora do Carme chega tarde e, por desgraza, obedeceu a criterios de natureza política, posto que a súa xestión da residencia foi obxecto de continuas controversias durante a presente lexislatura“, cuestionaron desde CIG.
A CIG tamén tachou a xestión de Escontrela á fronte da residencia de “nefasta” e lembrou que, en materia laboral, durante o seu mandato, retirouse o complemento de incapacidade temporal ás traballadoras, unha decisión que o Tribunal Superior de Xustiza de Galicia (TSXG) considerou ilegal, e mesmo vulnerou o dereito de conciliación.
Así mesmo, o sindicado, a través dun comunicado, fixo un chamamento ao goberno local de Sarria a “que actúe con todas as ferramentas” contra Escontrela pola súa “nefasta e caprichosa xestión da residencia”, ademais de pedir que se esclarezan con “pelos e sinais” os feitos acaecidos.