O comité de Inelcom en Sarria (Lugo) mantivo a cuarta reunión de negociación do expediente de regulación de emprego (ERE) coa empresa, tras a que segue sen ver a “causalidade” da medida que expón a dirección. Pola súa banda, os representantes dos traballadores esixen “claridade nos datos achegados” e “toda a documentación que aínda falta por entregar”.
“Insistímoslles en que cos datos achegados ata a data seguimos sen ver a causalidade da medida”, destaca a portavoz do comité, Olga López. Así as cousas, a comisión negociadora indicou que “de seguir insistindo en levar a cabo o ERE, deben achegar toda a documentación requirida e o número de afectados debe ser moi inferior ao exposto ata a data”, informa Lópoez.
“Esperamos que na reunión que imos manter o día 18 a empresa veña cunha postura clara e definida que nos permita avanzar nunha negociación que ata a data está a ser moi laboriosa pola falta constante de claridade da parte empresarial”, subliña.
