Amancio Prada actuará na Igrexa da Nosa Señora da Antigua no Colexio dos Padres Escolapios este sábado ás 21:00 h. O cantautor amosa a súa satisfacción nas redes sociais explicando que o escenario é impresionante e que este edificio, entre moitas obras de arte, conta con dous Grecos, un San Francisco e un San Lorenzo. Explica ademais que, tras ter a oportunidade de falar días atrás co director do Museo do Greco en Madrid, este díxolle que só por ter estas dúas xoias artísticas xa paga a pena visítalo.
Baixo o título “Cantigas no Camiño de Inverno” Prada cantará varias cantigas dos primeiros trovadores galego-portugueses, do disco Leila Doura, e dúas cantigas de composición recentes, inéditas: “Quand eu vejo las ondas”, de Roi Fernández e “Fui eu, madre, en romaría”, de Xoán de Requeixo. Ao Sil, ese río que atravesa a Ribeira Sacra e que tantas lembranzas lle trae ao autor, dedicaralle tres cancións: “Memorias de la infancia”, do poeta Enrique Gil y Carrasco, “Nocturno do adolescente morto”, un dos 6 poemas galegos de Federico García Lorca, e “O río levaba os ollos” de Álvaro Cunqueiro. No repertorio, segundo avanza no seu perfil da rede social Facebook, incluirá tamén algunhas coplas de tradición oral e cantares de Rosalía de Castro.
As entradas venderanse na porta da Igrexa dende ás 20.00 h. e o prezo é de 5 euros.
outras actividades da xornada
Antes do esperado recital de Amancio Prada, a Asociación Camiños a Santiago pola Ribeira Sacra ten programadas varias actividades para este 27 de abril, día central da celebración dos 20 anos de vida da entidade.
Ás 18:00 h. descubrirase unha placa conmemorativa e ás 18:30 h. visitarase a exposición de cartelería que hai no Centro do Viño, con máis de 40 carteis que serven para ter unha cronoloxía da historia do Camiño e da asociación. Nese mesmo lugar, ás 19:00 h., presentarase a reedición da Guía do Camiño de Inverno a Santiago, un traballo moi completo e rigoroso que asina Aida Menéndez Lorenzo. A continuación, pasarase un vídeo no que se fai un repaso dos 20 anos da asociación.
