O Concello do Saviñao deu a coñecer o seu programa cultural e deportivo para este verán. A oferta inclúe actividades para toda a familia e os interesados poderán inscribirse no Concello ata o día 26 de xuño.
Os lugares nos que se desenvolverán serán, entre outros, o Pavillón Municipal, a Praia da Cova, a Ludoteca e o Centro Sociocultural de Currelos. Os cativos poderán asistir a clases de baloncesto, fútbol, pádel, natación, kárate, pintura e patinaxe; cun prezo máximo de 15 euros ao mes, segundo a especialidade elexida. Doutra banda, os adultos terán a oportunidade de practicar pádel, ioga, natación, ximnasia e mantemento e pintura, algúns de xeito gratuíto.
Ademais, haberá sesións de contacontos na Biblioteca Municipal con entrada gratuíta os días 5 de xullo, 2 de agosto e 6 de setembro; e unha carreira popular o 3 de agosto. Outras actividades, coma o buceo ou o piragüismo, aínda teñen as súas datas por fixar.