O Concello da Pobra do Brollón, dentro do seu programa de dinamización cultural e de ocio que ten este verán, convídanos este 27 de xullo a vivir unha sesión de maxia a cargo do gran Mago Teto.
Baixo o suxestivo título de “500 anos da incrible historia da maxia”, o seu espectáculo centrarase en fantásticas e incribles historias que irán acompañadas de xogos e como sempre tamén moito humor e interacción co público. A actuación será ás 20:00 h. na Casa da Cultura Olga Novo e está enmarcada no Ciclo Ler Conta Moito que impulsa a Xunta de Galicia para incentivar a lectura.
E seguindo coa ‘oferta máxica’ para esta fin de semana, mañá domingo 28 de xullo o Mago Deimi, ilusionista orixinario das Terras do Ribeiro, desembarcará no Concello de Ribas de Sil co seu espectáculo “Apren-Deimi” distribuído por Hermanager Producións.
A proposta dobre de Deimi consistirá en ofrecer pola mañá, entre as 12:00 e as 13:00 h., un obradoiro de iniciación á maxia para os pequenos e pola tarde, ás 20:00 h., unha actuación no escenario do anfiteatro da Praia Fluvial de San Clodio.
Na sesión da mañá falarase do oficio de mago, do arte da maxia e ensinarase a técnica a través dalgúns números sinxelos. Este obradoiro desenvolverase na Aula de Pesca de San Clodio, na contorna da Praia Fluvial desta localidade.
A actuación da tarde, para todos os públicos, incluirá diversos de xogos de maxia: cartomaxia, manipulación, escapismo, mentalismo, maxia bizarra, levitacións, aparicións, maxia con lume, desaparicións, transformacións… Todo acompañado de moi bo humor, música de fondo para marcar o ritmo da maxia e participación activa do público.
