O Concello de Sober ofrece un concerto solidario na Praza do Concello o vindeiro sábado ás doce do mediodía. No mesmo participarán todos os músicos e directores vivos que teñen pasado pola Banda de Música de Sober.
A actuación, que forma parte dos actos de conmemoración dos 150 anos da Banda de Música local, ten tamén un fin solidario. Pídeselles aos asistentes, músicos e público, que acheguen un quilo de alimentos non perecedoiros para logo entregar a aquelas familias do concello que máis o necesiten.
Por outra banda, o mesmo 3 de agosto, o Concello de Pantón convida a un concerto de jazz exclusivo na Igrexa de Santo Estevo de Atán ás 19:00 h. A formación protagonista é Daniel Casares Quartet e a actuación, para todos os públicos, está enmarcada nos actos programados dentro das XXXII Xornadas das Rota do Románico. A entrada é de balde e o aforo limitado.