A ludoteca de Escairón acollerá en xaneiro un curso gratuíto de defensa persoal para mulleres e adolescentes. Levarase a cabo un día á semana e cada cita terá unha duración de 2 horas. Formarase ás asistentes en técnicas de prevención e autoprotección. A inscrición pode realizarse ata o 20 de decembro, no propio Concello ou a través do número 982.45.20.61.
O alcalde, Carlos Armesto, anima a todas as mulleres a participar nesta iniciativa, “Todo o que fagamos en materia de prevención sempre é positivo e necesario. Nesta tarefa non podemos dar nin un paso atrás. Por iso, dende o Concello quixemos facer este curso porque todos temos a obriga de parar esta lacra. Estamos convencidos e concienciados. Por iso, seguiremos impulsando máis actuacións deste tipo. O que queremos é un municipio libre de violencia machista”.
Manchas de frío
A Irmandade Cultural País do Faro colabora na presentación do libro “Manchas de frío”, da escritora de Paradela, Sonia Arias López. O acto terá lugar este xoves, 28 de novembro, no Círculo Recreativo Cultural de Chantada a partir das 20,30 horas. Participarán no evento os tamén poetas Ramón Rodríguez Porto e José Carlos Ulloa. No XdL falaremos coa autora este xoves ás 22.00.
