A Asociación Cultural, Educativa e Social aulABERTA ofrecerá un novo evento, e xa é o segundo dende a súa recente creación en Monforte, o mércores 20 de xuño ás 20:15 horas na Casa da Cultura Poeta Lois Pereiro de Monforte.
O evento, “Cultivando o sentido do humor”, consistirá nunha singular charla a cargo de Fidel Delgado coa que se pretende impartir coñecementos psicolóxicos dende a perspectiva do humor.
fidel delgado
Fidel Delgado traballou como psicólogo clínico no hospital universitario La Paz de Madrid, foi docente na Escola Universitaria de Enfermería e dedícase á formación de profesorado da rede pública de saúde. Tamén vai alí onde o chaman para transmitir bos consellos sobre unha vida fluída con charlas nas que se presenta como “titiripeuta”.
Destaca o seu discurso pola sinxeleza, sentido do humor, lucidez e sabedoría que transmite, estando a día de hoxe moi solicitado para dar charlas, conferencias e formacións. Tanto é así que Luís Carlos Parada, profesor do IES Río Cabe e presidente da asociación, dicía esta mañá en Radio Principal Cadena Ser que contactaron con el en febreiro e xa case non tiña datas dispoñibles.
Nunha recente entrevista a revistaesfinge.com autodefiníase do seguinte xeito: “soy indefinido, ilimitado, fiel a Fidel, pero Fidel se va viendo, según cada día transcurre. Alguien que estrena la vida cada día”.
