O martes 17 de xullo Sober ten a axenda completa.
Por unha banda, na estrada que conduce dende o núcleo urbano soberino a Doade -vía fundamental para os veciños e turistas da Ribeira Sacra- leváronse a cabo traballos de limpeza de cunetas, rehabilitación do firme con aglomerado en quente, renovación da sinalización horizontal e vertical, e repintado. Estes traballos, que abrangueron 4.46 quilómetros, foron financiados pola Deputación de Lugo con investimento total de 230.000 euros. Dende o goberno provincial destacan que “esta actuación beneficia tanto ós 2.300 veciños da localidade a máis dos milleiros de turistas que empregan esta estrada para acceder ós miradoiros do Canón do Sil e ás adegas. É unha das principais vías de comunicación da Ribeira Sacra e tamén unha das máis transitadas durantes as fins de semana, sobre todo na época estival”.
E pola outra, dende as 13:00 horas ata as 21:00, o concello soberino celebrará unha festa acuática con inchables no recinto das piscinas municipais. Esta é a primeira do verán onde os asistentes, por 2.50 euros os adultos e 1.50 euros os menores de 6 a 14 anos, poderán gozar dunha xornada de lecer nun día que se presume abafante. Dende a organización tamén lembran que as instalacións están dotadas de conexión wiffi gratuíta para que todos aqueles que desexen pasar a xornada no recinto e non se queiran mollar, poidan realizar outras actividades de entretemento.
