O alcalde da Pobra do Brollón, Xosé Lois Maceda, asegura que é “un orgullo contar cunha persoa da calidade humana e intelectual que ten Olga Novo”, orixinaria da parroquia de Castroncelos na Pobra do Brollón. “Non me estraña nada este premio que acaba de gañar nosa poeta. E xa avanzo que en breve faremos un recoñecemento desde o concello a este traballo fantástico que fai Olga. A nosa felicitación e a seguir gañando premios”.
A propia Olga Novo mostrouse sorprendida tras o recoñecemento, que “non é esperado pero supón unha gran felicidade, como o título da obra”, o seu poemario ‘Feliz Idade’. Novo precisou que este título responde a un intento de creación dunha nova idade, conformado por fragmentos vitais da súa vida.
“É o encontro da miña filla recentemente nada co meu pai que estaba no declive vital, enfermo e próximo á morte. Esa unión entre o avó e a neta está no corazón desta obra”, resumiu.
Respecto diso de si supón “un antes e un despois” ao seu labor creador, Olga Novo esgrime que no seu caso empezou a escribir poesía “entre o sete e o oito anos”. O poeta da Pobra do Brollón subliñou que leva “toda a vida escribindo e por tanto é moi anterior (esa faceta de escritora e poetisa) a calquera premio”.
“Cando o creador sente a creación como unha necesidade vital e como unha experiencia na vida, diso non se pode prescindir. Un premio é unha alegría, o recoñecemento sempre é importante pero iso non significa que un poeta vaia a escribir máis por iso”, conclúe.
