Esta será a edición número 20, que este ano está condicionada pola situación sanitaria, xa que a pandemia afectou á vida cultural tanto como á vida cotiá e profesional.

Segundo indican dende a organización, “a situación obrigou a aprazar a convocatoria do premio e agora sae unha convocatoria que terá que realizarse nuns prazos moi diferentes dos que adoitamos”. Aínda así a decisión foi seguir adiante e facer un esforzo para non deixar este fatídico 2020 sen o premio Fiz Vergara.

O prazo de presentación de orixinais remata o vindeiro 18 de novembro e o ditame coñecerase antes de que remate o 2020.

No comunicado breve no que anuncian a convocatoria esperan que todo o esforzo por darlle continuidade ao certame nun ano coma este “nos agasalle cun poemario que poña, de seguro, un pouco de luz nestes tempos tan escuros”.