Partindo dunha presentación, na que o debuxante Xosé Manuel Fernández conta a súa propia experiencia, avanzarase para coñecer o máis básico e importante desta disciplina artística.
Diferenciarase humor gráfico de banda deseñada e sairán temas tan importantes como as fontes da imaxinación, a creatividade, consellos profesionais, aspectos máis técnicos como a linguaxe da banda deseñada… E para rematar, realizarase algún exercicio práctico.
Segundo informa a xerente da librería monfortina, Rocío ‘Peruchela’, o obradoiro empezará ás once da mañá do sábado 21 e só poderán estar de forma presencial tres cativos/as. Aínda así, será retransmitido a través das redes sociais en pequenos vídeos en diferido para que o poidan seguir moitos/as máis rapaces e rapazas dende as súas casas.
Xosé Manuel Fernández Montes é un galego orixinario de Quiroga pero con residencia actual en Monforte. Entre as súas dedicacións profesionais está o debuxo e a ilustración, disciplina que practica dende que era un neno.
A súa formación non é universitaria nin académica, basicamente autodidacta que se vai complementando con colaboracións e encargos de traballo semanais.
Entre as diferentes publicacións nas que ten colaborado está a coñecida revista humorística “Retranca”, o suplemento de humor “O Farelo” do desaparecido xornal A Peneira ou o xornal Galicia Hoxe do grupo El Correo Gallego. Dende o ano 2012 encárgase dunha sección semanal de humor do dixital Galicia Confidencial e dende 2015 fai viñetas para outro dixital, neste caso en castelán, Creando Tu Provincia.
Dende o 2015 ofrece obradoiros de coñecemento e aprendizaxe básicos sobre debuxo e banda deseñada. Dende 2017 forma parte das propostas do Ciclo “Ler conta moito” que promove a Xunta de Galicia cunha actividade sobre humor gráfico.
