O 19 de xaneiro deste ano lembrarase pola ‘non celebración’ da ancestral “Festa dos Fachós”. Dende o ano 1751 levan vivindo en Castro Caldelas esta festa con tanta raizame para todos os caldelaos e caldelás… pero o coronavirus impediuno.
“Son 270 anos de tradición, de procesión e lume na honra do San Sebastián, de desgustar os chourizos e o viño novo, de esa emoción que che recorre o corpo cada vez que escoitas ‘Viva o San Sebastián’ ou ‘Vivan os Fachós’, de amizade, de troula e de ledicia compartida cos milleiros de persoas que sempre nos acompañan”. Estas son as palabras textuais de parte do comunicado que fixo o concello na súa páxina web e nas redes sociais.
Con moita mágoa por ter que pasar páxina este ano deste xeito convocouse xa a veciñas e veciños, así como tamén aos visitantes e amantes desta celebración, para o vindeiro ano.
Así mesmo, e para lembrar os momentos vividos o ano pasado, o concello fixo pública a resolución do “I concurso de fotografía da FESTA DOS FACHÓS” coas fotografías gañadoras.
O primeiro premio foi para Brais Lorenzo Couto coa fotografía “Esforzo”, e o segundo para Pilar Chaos Rodríguez coa imaxe titulada “Tradicións”. Os premios que levan son 400 e 150 euros respectivamente.
O resto de fotografías con mención e gratificación económica pódense ver na páxina web do Concello de Castro Caldelas.
