A segunda edición do 17º Ribeira Sacra que se celebrou na última fin de semana de xullo incluía este ano a novidade dunha segunda fin de semana máis, baixo o nome 17º patrimonio. O sábado 4 inclúe concerto de Mounqup ás 12.00 no catamarán de Santo Estevo. Ás 13.30 no Parador de Santo Estevo concerto de Ele e ás 20.00 no castelo de Castro Caldelas actuarán Los hermanos Cubero, Natasia Zücker e Ses. A clausura do festival terá lugar o domingo, día 5 ás 13.00 na Rectoral de Gundivós, en Sober.
II edición do 17º en cifras
4.000 persoas na Ribeira Sacra, o 16% de fóra de Galicia. Do total de visitantes o 80% era a primeira vez que se achegaban á Ribeira Sacra. Ocupacións hoteleiras do 100% en Monforte e Sober. Un volume de negocio de 250.000 euros cun gasto por visitante duns 70€, ao redor de 180€ quenes estiveron os 3 días. 70 empregos directos, 30 deles na mesma Ribeira Sacra.
Desde a Deputación Provincial que patrocina o Festival con 26.000 € e desde a propia organización, aseguran que estas cifras confirman o éxito desta II edición, superando todas as espectativas e confirmando a importancia que ten a cita a nivel turístico. Destacaron tamén o impacto mediático conseguido, xa que moitos medios a nivel estatal o recomendaron como a mellor actividade cultural da fin de semana e incluso de todo o verán en Galicia.
