O pasado 2 de maio, o Concello de Sarria organizou un acto no que se lle puxo o nome de Xela Arias a unha rúa, concretamente á rúa José Antonio Primo de Rivera.
Ademais de descubrir a nova placa da rúa co seu nome, inaugurouse un retrato mural da intelectual sarriá, a gran tamaño e realizado na parede dunha casa polo artista Mon Devane.
Acompañaron ao equipo de goberno e á familia de Xela neste emotivo acto: Victor Freixanes, Presidente da Real Academia Galega, María José Gómez, delegada Territorial de Cultura da Xunta de Galicia; Efrén Castro, deputado provincial e Mónica López, ambos concelleiros de Sarria.
O concello agradeceu, ademais, a presenza de veciñas e veciños no xardín da Capela de San Lázaro e a participación no evento de Arlindo, a asociación Peleriños e Malditos Roedores.
EXPOSICIÓN
A exposición itinerante para exteriores organizada pola Vicepresidencia da Deputación de Lugo: “Xela Arias. A poesía do retrato” poderá verse nas rúas de Sarria ata o 20 de maio. Aquí podedes acceder ao mapa da exposición.
