O FanCine de Lemos, tras un ano en suspenso por mor da pandemia, volve este 2021 e realizarase en Monforte de Lemos do 21 ao 25 de xullo. Unha das novidades desta sétima edición foi que convocou meses atrás un concurso para seleccionar o cartel anunciador.
Segundo se informara no seu momento en Xornal de Lemos, o obxectivo do certame era estimular a creatividade de artistas e deseñadores da contorna e promover a imaxe do certame nesta edición a nivel nacional e internacional.
O Xurado do concurso do cartel do VII Festival de Cinema Fantástico, FanCine de Lemos 2021, reuniuse o pasado 18 de xuño e emitiu o fallo nun encontro virtual. O gañador resultou ser o deseñador noiés Santiago Avilés.
Tal como se establecía nas bases, levará un premio en metálico de 300 euros –exento de IVE– e un diploma que se entregará na gala de clausura do festival.
Dende a dirección do festival aproveitan para agradecer a participación de todos os creadores que participaron no concurso e a implicación do xurado, conformado por Isabel González (deseñadora gráfica), Reinaldo Pereira (xestor cultural) e Elena Patiño (deseñadora gráfica).