Como xa é costume chegadas as datas de verán, o Concello de Ribas de Sil deseña unha ampla axenda de actividades para gozar na Praia Fluvial de San Clodio.

As actividades empezaron este venres 16 cun espectáculo de monicreques a cargo da compañía “Garabato de Xogos”, e o vindeiro domingo 18 ás 20:00 h. actuará Paco Nogueiras. Este último chega co esu espectáculo musical “Brinca Vai”.

De cara á vindeira semana, o venres 23 ás 20:00 recunca Garabato de Xogos, nesta ocasión co espectáculo “O gato simple”; o sábado 24 chega o Mago Deimi –Hermanager Producións– cunha dobre proposta: pola mañá ofrece un obradoiro de maxia ás 12:00 h. na Aula de Pesca, e pola tarde, ás 20:00 h., un espectáculo de maxia no anfiteatro da Praia Fluvial.

Para o domingo 25, día de Galicia, haberá un contacontos a cargo do narrador Caxoto. Será ás 20:00 h. e a proposta: “Contos de medo que deixan durmir”.

Rematando o mes de xullo, na súa derradeira fin de semana, recunca Caxoto cun contacontos o venres 30 ás 20:00 h. e o sábado 31 actuación de Sr. Jingles, un concerto para público adulto que comezará ás 23:45 h.

Sr. Jingles é unha proposta musical con influenzas nacionais do rock clásico como Carlos Tarque, M-Clan, ou Vetusta Morla.