Despois de ter que cancelar a súa última edición, xusto o día antes da súa celebración o pasado 2020, o festival de música independente xa consolidado en Sarria regresa cunha edición especial e de balde este 24 de xullo.
Esta nova edición do “Esmorga Fest” terá lugar no Campo de Rugby de Sarria, un espazo amplo e ao aire libre que, xunto con outras medidas anticovid, garantirán a seguridade dos seus asistentes. As portas do recinto abriranse ás 18:00 h. e actuarán os seguintes grupos: Niña Coyote eta Chico Tornado, Holywater, Depresión Sonora e Monteperdido.
ALFOMBRAS NO CAMIÑO
Este sábado e domingo, alfombristas de Sarria participarán nunha iniciativa que consiste na elaboración da ‘alfombra mundial de 2021’. Unha creación floral que se realizará simultaneamente en 250 países de todo o mundo con tradición na arte efémera para conmemorar o Xacobeo 2021-2022.
Os traballos comezarán este sábado 24 a partir das 17:00 h. e a ubicación será na Rúa do Peregrino ao final do Malecón.
ABRAHAM CUPEIRO
“Resoando no Camiño Francés”, o proxecto artístico do músico sarriao Abraham Cupeiro, chega a Sarria o Día de Galicia. O espectáculo será no Mosteiro da Magdalena o 25 de xullo ás 20:00 h.
Recoméndase reservar praza no teléfono 982 535000.
NARRA SARRIA
O primeiro Festival de Narración Oral e Contacontos que se organiza na vila de Sarria segue a axenda prevista e este domingo 25, Día de Galicia, contará con dúas interesantes propostas.
Ás 12.30 horas, no Malecón, está programado o espectáculo “O agasallo das árbores“, de Cris de Caldas e Xabi do Camiño. Trátase dunha sesión de contos familiar con música en directo que ten como fío condutor o conto dos tres porquiños e a concienciación medioambiental.
Xa pola tarde, ás 20.00 horas, estará de novo Cris de Caldas, esta vez en solitario coa súa proposta narrativa, “Un feixe de contos“. O contacontos será onde a Iglexa de Santa Mariña.
