Seguindo coa programación que cada verán deseña o Concello de Ribas de Sil para amenizar as fins de semana na contorna da súa Praia Fluvial de San Clodio, estes días pódese aproveitar para gozar dun concerto e dunha actuación de maxia.

O sábado 7 actuará David Prado coa súa formación en trío acústico. Un repaso aos temas do seu último disco “Unha viaxe perfecta”, no que abrangue os puntos cardinais do amor, a felicidade e o desamor. Será ás 20:00 h. no anfiteatro da Praia Fluvial.

Na mesma ubicación e á mesma hora, o domingo 8 estará Mago Paco co seu espectáculo “Hocus Pocus”. Trátase dun espectáculo de maxia infantil cheo de risas, cor e moitas sorpresas. Unha proposta moi participativa que fará pasar intres moi divertidos ao público.