A mostra Manuel Jorge. Seis décadas de retrato, recolle algunha das obras dos máis de trescentos cadros que o autor deixou como legado á Asociación Amigos de Manuel Jorge de Chantada. Trátase de obras inéditas do pintor chantado falecido o pasado ano. Vinteoito cadros do artista que van dende 1959 ata o 2013, amosando a diversidade de técnicas e estilos cos que experimentou ó longo da súa traxectoria. A maior parte destes cadros nunca se expuseron en Chantada ou incluso en Galicia, polo que a comisaria da exposición, Lola López, agarda que sorprendan a un público xa familiarizado coa obra do chantadino: «Manuel Jorge pintou moito e cada vez que navegamos polo seu legado atopamos novas sorpresas. Hai cadros que nin sequera están nos catálogos e por iso creamos lecturas que nos permitan achegarnos á súa arte dende outros puntos de vista». Por este motivo a docente e especialista en Belas Artes decidiu apostar por unha exposición monográfica adicada ó retrato, «tal vez non é o máis destacado, pero si amosa a súa evolución técnica e estilística coa circunstancia de que remata case igual que como comezou, con simples trazos sobre papel».
A exposición poderá visitarse ata o 5 de setembro, con horario de 19 a 21 horas os venres, de 12 a 14 horas e de 19 a 21 horas os sábados, e de 12 a 14 horas os domingos.
O 3 de setembro farase un concerto homenaxe cos irmáns López Jorge. Un recital de piano e violín, que servirá como homenaxe póstuma ó autor. Tamén será a oportunidade de presentar os proxectos de futuro da Asociación e a súa páxina web, manueljorge.com.
