A exposición “Folión de Carros. Patrimonio Cultural de Chantada”, deseñada pola Asociación Cultural Amigos do Folión está comporta por 32 paneis en 8 cubos con catro caras. Cada cara/panel está composta por unha imaxe representativa do Folión de Carros, unha breve descrición da propia imaxe e a identificación do/a autor/a da fotografía.
As imaxes seleccionadas ofrecen unha mostra da diversidade propia da celebración e a importancia que teñen as persoas para a súa continuidade. Utilízanse tanto fotografías do propio desfile como de outros aspectos que os carroceiros e carroceiras consideran relevantes para o Folión de Carros: preparación, cooperación ou desmontaxe dos carros.
As fotografías do desfile mostran as características principais do Folión de Carros: representación de oficios e labores antigas, xugadas de bois e vacas, ambiente festivo, emocións intensas durante o Folión e moita colaboración entre os carroceiros e carroceiras.
As imaxes utilizadas na exposición foron tomadas polos fotógrafos chantadinos Segundo Navaza, Lucía Cereijo e Martín Varela entre os anos 2016 e 2019, a excepción da imaxe do carro “O lugar da Hermida”, que foi tomada no ano 2000 e que forma parte do arquivo gráfico da Asociación Cultural Amigos do Folión.
