A Feira do Libro de Monforte celebrarase nas súas datas acostumadas, do 25 ao 28 de agosto, sendo nesta primeira xornada –día 25– cando se realice a inauguración e o tradicional pregón.
Para este cometido coñecemos que este ano a escollida foi a escritora Moncha Prieto, unha soberina que retornou de Barcelona hai xa bastantes anos e que vén de publicar “Alma de Barro. Relatos da Ribeira Sacra” coa Editorial Xerais.
A inauguración oficial será, pois, o día 25 de agosto ás 19:00 h. Ademais da asistencia de autoridades, será nese intre cando Prieto lerá o seu pregón antes de proceder á sinatura do seu libro sobre as 20:00 h.
Cóntanos esta soberina que lle colleu un pouco por sorpresa este encargo. Enterouse tras recibir a chamada da coordinadora de Feiras do Libro de Galicia que lle trasladou esta decisión e algúns detalles do protocolo da inauguración, na que ela estaba sinalada como pregoeira do evento.
Aínda que a noticia lle chega ‘con pouco marxe de tempo’ non agocha a satisfacción de que pensaran nela para esas primeiras palabras de apertura da Feira do Libro da capital da Ribeira Sacra.
