“Cancioneiro do Camiño” preséntase este domingo en Quiroga

Manoele De Felisa e o seu grupo levan a Quiroga o seu último traballo “Cancioneiro do Camiño”. Na presentación destes poemas relacionados coa Ruta Xacobea contarase co acompañamento do músico quirogués, Samuel Soto.

CANCIONEIRO DO CAMIÑO de Manoele De Felisa.

O Cancioneiro do Camiño recolle “18 cantigas, 18 historias que convén ser cantadas e contadas”, como di Manoele De Felisa. Trátase de poemas dos textos de dezaoito escritores cos que o cantautor nado en Cuntis narra as historias tradicionais que aparecen neste disco.

Samuel Soto, quirogués afincado en Vigo, ten unha longa traxectoria no mundo da música tradicional tendo colaborado con moitos grupos e proxectos. Colabora con Queiman e Pousa, é bouzoukista en Sondeseu, músico evocalista en Ardentía e acompaña sobre o escenario ao gaiteiro Isidro Vidal. Ademais, é mestre de música, colabora con moitas agrupacións musicais é destaca tamén como autor de varias cancións dedicadas aos últimos escritores homenaxeados nas Letras Galegas. Estes últimos días está sendo viral coa súa composición musical dedicada ao Nadal titulada Nadal 2021 – Aninovo 2022.

A actuación deste domingo, 19 de decembro, será no Auditorio Municipal a partir das sete da tarde.

DEIXAR UN COMENTARIO

Please enter your comment!
Please enter your name here