A antropóloga e etnomusicóloga, Beatriz Busto Miramontes, presentará na Pobra do Brollón o seu libro-CD Pandereteiras de Mens, publicado o pasado decembro por aCentral Folque.

O libro afonda na vida das cinco Pandereteiras de Mens, que dende a comarca de Bergantiños, cruzaron fronteiras e racharon estereotipos coa súa música. Elas son as primeiras mulleres que, sendo labregas, levaron o formato das pandereteiras aos escenarios públicos nos anos 70 e 80. “Esta presentación é unha homenaxe a todas as mulleres que abriron camiño e permitiron que a nosa música tradicional teña a impacto de hoxe, como estamos vendo co fenómeno Tanxugueiras,’ declara o alcalde da Pobra do Brollón, Xosé Lois Maceda.

O libro contén fotografías a cor, unha excelsa compilación de músicas e transcrición de letras e músicas en partitura, para o que a autora contou coa colaboración do etnomusicólogo, Sergio de la Ossa. A presentación rematará con actuación das pandereteiras de Samoeiro seguida de foliada.

Dende a organización anímase aos asistentes a levar os seus instrumentos. “Con este evento retomamos a programación cultural e as implicacións positivas que ten para a vida comunitaria na Pobra do Brollón,’ comenta o concelleiro de Cultura, Ricardo Rodicio. Hai que reservar sitio no teléfono 650 624 828, preferiblemente por WhatsApp. Cumpriranse as medidas sanitarias precisas