O profesor de Historia Medieval na USC Israel Sanmartín vén de impartir no IES A Pinguela de Monforte unha interesante conferencia sobre “La Edad Media y el Cómic” na que analizou as características dese medio de expresión e de como foi evolucionando desde os seus controvertidos nacementos ata a actualidade. Na charla tamén se referiu á utilización do cómic como entretemento, pero tamén como ferramenta para reflectir valores políticos a través dunha imaxinaria Idade Media; e neste caso sinalou a súa ligazón co movemento neomedievalista actual.
No transcurso da súa exposición amosou exemplares de heroes do cómic medieval, coma o Capitán Trueno, El Príncipe Valiente, El Guerrero Enmascarado… e tamén deu conta dos primeiros exemplares de Flechas y Pelayos.
Segundo explica o director, Enrique Sampil “na biblioteca do noso instituto están a disposición do alumnado numerosas coleccións de cómic, tanto clásico coma moderno, polo que cremos que esta actividade formativa remata tamén cun… continuará”.
