O Concello de Sober organiza a proxección en pantalla xigante, a través de ‘Cine da Rúa’, do último filme do director monfortino, Dani de la Torre, ‘Live is Life. La gran aventura’.

O pase terá lugar o vindeiro venres, 29 de xullo, ás 22:30 horas na Praza do Concello de Sober con entrada de balde para quen queira asistir.

O rexedor, Luis Fernández Guitián, destaca a importancia deste evento por dous motivos. “Dun lado agradecerlle a Dani de la Torre que elixira Sober como un dos escenarios da súa nova película. E en segundo lugar, poder achegar este filme a todos os veciños e veciñas de xeito totalmente gratuíto”.

O rexedor convida a todos e todas os soberinos e os que nos visiten nesas datas a participar da proxección do filme nunha contorna especial, como é a Praza do Concello da localidade. “Estamos desexando ver as paisaxes que recolle a película da Ribeira Sacra e do noso Concello en pantalla xigante e en Sober”, remarca.