A Festa do Peregrino de Triacastela deu comezo este sábado coa apertura dunha exposición sobre Cova de Eirós a cargo do fotógrafo, José Salgado, que se pode visitar na Fonte do Lunar.
O xornalista de Sarria, Manuel F. Rodríguez, encargouse do pregón desta edición, dixo respectar “a cantas persoas realizan a ruta xacobea, sexa polo motivo que sexa e desde onde sexa, incluídas aquelas que escollen realizar só os seus últimos 100 km. Respéctoos porque é unha cuestión de liberdade. Que vaia isto por diante. Pero sinto pena que na actualidade a maioría deses peregrinos, aínda podendo, realicen esta ruta só desde a miña querida Sarria. Non é só que o Camiño de Santiago teño historicamente un sentido alleo por completo a iso. É tamén canto se perden antes! Entre outras cousas, esta Triacastela única, esta primeira conexión plena con Galicia”.(…) “Non podemos perder o sentido do Camiño como unha vía transversal por Europa cuns valores únicos no mundo. Un Camiño sempre aberto”, expuxo o xornalista quen eloxiou unha Triacastela cuns veciños e veciñas hospitalarias das que deron conta ao longo dos séculos números peregrinos nos seus libros e escritos.
No acto tamén se lle rendeu homenaxe póstuma a dous artistas da zona; ao escultor en madeira, José Luis López Río, autodidacta, creador e investigador de formas polo seu enorme labor e a súa contribución á difusión da cultura e os procesos creativos, e ao cesteiro, Jesús García Gómez, un dos representantes máis sobranceiros desta mestría na Serra do Oribio pola súa contribución á difusión do saber facer tradicional.
Para continuar unha moza italiana pertencente aos voluntarios internacionais polo corpo europeo de solidariedade ‘Xuntos Xacobeando’ leu un poema. A esta intervención seguiuna a presentación do libro ‘Breicar no Camiño de Santiago’ da veciña de Triacastela, Mirella López Díaz.
