O mércores 7 de decembro terá lugar en Perugia a representación da ópera Loba branca (Lupa bianca), do pianista e compositor galego Brais González en Perugia. A ópera está baseada nunha lenda do Courel e foi estreada xa en Italia o pasado mes de agosto no 55 Festival delle Nazioni de Città di Castelllo.

O pasado mes de setembro, nunha entrevista concedida a Nós Diario, o compositor galego explicaba que con esta obra, que logrou emocionar ao público italiano, “pretendía render homenaxe á lenda da Serra do Courel”. Brais conta tamén noutra entrevista de Inma Otero, para a revista literaria italiana Insula Europea, que a lenda da loba branca pareceulle “un bo xeito de reflexionar sobre os conflitos entre o home e o seu entorno no medio rural”.

A representación da Loba branca é posible grazas ao Centro de Estudos Galegos da Universidade de Perugia. Será no Teatro Cucinelli di Solomeo ás 21:00 h.

LENDA DA LOBA BRANCA

Reflicte o conflito creado entre os lobos e xente dunha aldea do Courel. A morte da líder da manda, a Loba branca, provoca unha maldición para as xentes do lugar que só conseguen atallar grazas ao consello dunha meiga.