O Círculo Recreativo Cultural de Chantada acolle este sábado unha actividade organizada pola Irmandade Cultural País do Faro. Ás 20.00h presentarase o libro “María Casares fronte ao espello”, por parte de Anxo González Guerra. O acto ten entrada libre e de balde.
Este domingo, día 21 de maio, a Banda de Música de Chantada ofrecerá o xa tradicional “Concerto do Socio”, que leva por título “Chantada: música e inspiración”. Nesta ocasión a Banda amosará como a vila de Chantada foi inspiración para moitos músicos que decidiron deixar rexistro musical desas lembranzas, imaxes, gastronomía, ou das xentes do corazón de Galicia. Máis aló da Muiñeira de Chantada, haberá exemplos de pasodobres como Chantada, moi interpretado polas bandas nas alboradas e que leva a muiñeira na súa parte final; O Chantadino, do mestre Groba, dedicado a un bo amigo del con orixes nesta terra; O Rato, dedicado ao Presidente de Honra da Banda, Antonio Serafín Ledo Palacios, e que se estreou o pasado verán; ou Recordando Chantada, do mestre portugués Fernando Ferreira da Costa, cunha fermosa historia detrás.
Non faltarán obras sinfónicas como a Sinfonía Romaría de David Fiuza, da que se interpretará o último movemento, de nome “Derradeira carallada: Muiñeira de Chantada”, ou Chantada, obra feita polo mestre Raúl Martín Niñerola para conmemorar o 150 aniversario da banda hai xa uns anos, e que “describe musicalmente paisaxes que están no ADN chantadino como o monte do Faro, a Feira do Viño, ou o Entroido Ribeirao”.
