Este programa de actividades, pensado para achegar as novas xeracións ao rural, amosando a importancia do sector primario para a produción de alimentos saudables, a conservación do medio ambientes e da cultura tradicional chega na zona sur da provincia a Anpas da Pobra do Brollón, Triacastela, Oural (Sarria), Samos, O Páramo, Pantón, O Incio, Taboada, Bóveda, Monforte de Lemos e Paradela.

As anpas elixiron nun amplo catálogo educativo que inclúe 29 granxas, repartidas por toda a provincia, con actividades diversas, desde a produción de froita e produtos de horta ata a cría de gando vacún, ovino, cabrún, avícola ou cabalar ou a elaboración de queixos e marmeladas, ademais de obradoiros de educación ambiental impartidos pola asociación ecoloxista Adega nos propios centros.

A deputada, Mónica Freire agradece a colaboración das granxas e producións agroalimentarias que participan no programa, que este ano contaba con novas incorporacións respecto a edición pasada, como Galletas Daveiga de Chantada, Gandería Quintián do Páramo, Granxa Aeiroá de Láncara e SAT O Palomar de Láncara, que participaron por primeira vez nesta edición. Súmaronse a outros proxectos que xa recibiron visitas na pasada edición na zona sur da provincia como: Airas Moniz de Chantada, Caurelor de Quiroga ou A Casa da Fonte de Pantón.