O pasado sábado celebrouse na Casa da Cultura Lois Pereiro de Monforte de Lemos a gala de clausura e a entrega de premios da Fancine de Lemos 2023. Conducida pola xornalista monfortIna, Manola Porto, e coa intervención de Iván Patiño, director do festival e Marina Doutón, concelleira de cultura. Os premios foron entregados polos membros do xurado: Marian Salgado, Aida Cordero e Marina Doutón.
Palmarés do Fancine de Lemos 2023:
- Premio á mellor curtametraxe galega por ‘Compañeiros’, de Fernando Tato. Unha historia sobre dous mozos compañeiros que se reencontran despois de trinta anos. O que parece unha coincidencia, faise raro ata converterse nunha situación cada vez máis estraña.
- Premio á mellor curtametraxe nacional por ‘Els Mal’ de David Mataró. Unha película sobre o amor
adolescente entre unha nena vampiro e un neno humano que descubrirá que o máis difícil de namorar é coñecer á familia da túa nena, sobre todo se son vampiros. - Premio á Mellor Curtametraxe Internacional por ‘Ovo’ de Steve Spasojevic. Esta é a historia do
encontro entre un sorprendente robot do espazo exterior e un adorable paxaro. - Premio do Público por ‘Box Fox‘ de Aurora González Segura/ Ángela Ronco Núñez/ Juan José Romero Cortina. Un raposo intrépido viaxará por un perigoso mundo de fantasía para atopar a unha enigmática nena cuxo rostro aparece nun misterioso arquivo.
- Mención especial para ‘Anecoica’ de Marcos Callejo. Ana, unha muller pobre e viúva, preséntase como voluntaria nun experimento ilegal para gañar cartos: estará encerrada nunha habitación anecoica, o lugar máis tranquilo do mundo, onde debe permanecer o maior tempo posible se quere ser recompensada.
Coa proxección da película ‘El Exorcista’, nos multicines Hollywood de Monforte de Lemos púxose o punto e final a esta novena edición do Lemos Fancine Festival, que foi segundo o seu director, Iván Patiño, a máis exitosa, sinalou que por Monforte pasaron máis de 1.500 persoas,segundo as primeiras estimacións dos organizadores, ás proxeccións asistiron cada día unhas 150 persoas. Pola súa banda, a proxección da película ‘Unicorn Wars’, Goya á mellor película de animación deste ano, contou coa participación de máis de 200 persoas. “Contamos coa presenza de moitos dos directores de curtametraxes chegados de distintos puntos de Galicia e de España e tivemos moita repercusión mediática tanto na prensa escrita como na televisión autonómica e nacional’, salientou Iván. “O Fancine de Lemos converteuse nun evento de referencia no mundo do cinema fantástico. Aínda ten marxe para medrar, e iso tamén dependerá da implicación das institucións’.
