Durante a primeira fin de semana de agosto o festival Sarria&Blues no Camiño encherá as rúas e prazas de Sarria de música en directo, cunha programación que inclúe a grupos locais xunto a bandas nacionais e internacionais, sen faltar actividades culturais e gastronómicas.

O xoves, día 3, despois da apertura oficial, celebrarase un concerto no atrio da Igrexa de San Salvador a cargo de Lust ‘N’ Found, un dúo de Street Blues, que co seu estilo persoal realizarán un percorrido musical que partirá das raíces do xénero a principios do século XX, para acabar na súa influencia nos anos 70. O escenario nocturno trasládase á Praza de Santa Mariña, onde actuarán The Hoodoo Doctors, unha banda especializada en Chicago Blues.

O venres 4, Lust ‘N’ Found refórzanse co armonicista MA Lonesome, nun concerto para os maiores na Residencia, e ao mediodía a Pianista, Sister Marion, acompañará ao investigador musical, Héctor Martínez na presentación do libro “Al compás del Vudú”. Pola noite celebrarase unha gran festa na que colaboran e intégranse os dous festivais que esa fin de semana coinciden na vila: A Verbena Fest e o Sarria & Blues no Camiño, con gastronomía afroamericana, baile e música, a cargo de Taninos Maduros, Os Naipes, O Pavoni & The Moonshine Tones, e fin de festa con DJ Grande Osso.

O sábado 5, a banda The Dixie Blinders abrirá o pasarrúas popular que pechará un escenario móbil con The Hoodoo Doctors. Co luscofusco chegará ao escenario da Feculera o blues e o rhythm blues de Índigo Blues, unha banda integrada por seis mulleres procedentes de diversos estilos de música negra. Tras elas subirá ao escenario Gisele Jackson & The Shu Shu’s, unha das mellores bandas internacionais de Soul Blues, cunha cantante que comezou o seu camiño acompañando a mitos como James Brown.

O peche ao festival farase o domingo, día 6. Nesa xornada contarase coa música de The Hoodoo Doctors e Lust´n´Found e presentarase a revista, Macheta.