Este martes, 1 de agosto, presentouse no Pazo de Ferreiroá unha nova edición do Trece Roeis, festival de referencia na Ribeira Sacra que organiza a Asociación Cultural 13Roeis para os días 18 e 19 de agosto. Participaron representantes da asociación organizadora, representantes municipais e o delegado da Xunta en Lugo, xa que as administracións local e autonómica colaboran no evento.
Todos agradeceron as colaboracións e felicitaron a iniciativa que leva o nome de Pantón e da Ribeira Sacra máis alá das fronteiras de Galicia, cun cartel que chega a todos, especialmente á mocidade, dando protagonismo ao talento galego.
Javier Arias resaltou que a Xunta “aposta por propostas como esta, que funcionan como un importante reclamo cultural e turístico e suman un atractivo máis que favorece a dinamización económica e a promoción de Pantón e de toda a Ribeira Sacra”.
O programa do venres, 18 de agosto, inclúe as actuacións de Reincidentes, Kaotiko, Lamatumbá, Catuxa Salom, Lucía Aldao, Tiam GZ, The Poet’s Silence, Enxeito e Tirapralá. O sábado, 19 de agosto, será a quenda de SFDK, Auxili, Benito Kamelas, Tribade, Sofía Espiñeira, Tregua, Monoulious DOP, Uxía Lambona e a Banda Molona e Festicultores Troupe.
