Este venres comezaba en Ferreira unha nova edición do Trece Roeis Fest que organiza a asociación 13Roeis. Na primeira xornada contouse coas actuacións de: Lucía Aldao, o leo de matamá, Tirapralá Baturruka, Enxeito, Catuxa Salom, Reincidentes, Kaotiko, Lamatumbá e The Poet’s Silence. TIAM Gz non realizou o segundo pase xa que que ante a ameza de choiva decidiuse cancelar por “motivos de seguridade”, segundo explica a organización nas súas redes sociais, agradecendo a comprensión e amabilidade da formación e do público.

Hoxe sábado, 19 de agosto, a música correrá por conta de SFDK, Auxili, Benito Kamelas, Tribade, Sofía Espiñeira, Tregua, Monoulious DOP, Uxía Lambona e a Banda Molona e Festicultores Troupe.

O festival que conta con actividades complementarias vinculadas ao viño, a literatura ou a gastronomía dispón de zona de acampada para a que desde a organización demandan respecto como zona de descanso, “Non estamos en contra da festa, queremos que veñades a pasalo ben e o mellor posible, pero NON imos tolerar e permitir que se enturbie o descanso da xente na acampada. As normas da acampada son claras: é un espazo de descanso. Na xornada de hoxe estaremos máis encima desta situación e a mínima queixa tomaremos as medidas oportunas. Veñamos a disfrutar do festival pensando tamén no que tes ao lado. Grazas pola vosa comprensión e colaboración.”

As festas seguirán en Ferreira coa celebración das Festas de Ferreira que organiza o concello. O domingo, día 20 de agosto comezará con sesión vermú nos bares de Ferreira e na Praza de Goián. Ás 17:30 na Praza do Concello, Infantilandia, con xogos e actividades para os/as máis pequenos/as. A partir das 21:30 contarase coas actuacións de charanga KM0 e as orquestras Nueva Fuerza e Florida Band.

O luns, 21 de agosto, tamén comezará con sesión vermú; durante a tarde Infrantilandia e pola noite a festa estará amenizada pola charanga Tatoo e as orquestras Ritmo Xoven e Galilea.