O pregoeiro deste ano foi Francisco Javier Fernández Narla, autor de novelas históricas e de misterio. Naceu en Lugo en 1978. Piloto aéreo de profesión, comezou a súa carreira literaria en 2009 cunha novela de terror, “Los lobos del centeno”, de ambiente galego que acadou un gran éxito en España e Latinoamérica, á que seguiu a novela negra “Caja negra”. O alcalde, José Tomé Roca, referiuse a el coma “un excelente e polifacético pregoeiro, que nos honra coa súa presencia e que vai contribuír, estou seguro, a que esta 24ª edición da Feira do Libro de Monforte teñan uns bos resultados”.
“O evento que forma parte do programa do Verán Cultural do Concello, sérvenos para que todos poidamos encontrarnos coa literatura na rúa, e sérvenos para render unha merecida homenaxe ós libros, ós seus escritores e escritoras, e tamén ós editores e libreiros e libreiras, que son os encargados de facernos chegar as obras ós lectores”, indicou o mandatario municipal, que destacou a presenza de varios escritores e escritoras da Ribeira Sacra, e tamén do resto de Galicia. A través deles, “potenciaremos e daremos a coñecer o talento literario que temos na nosa comarca e tamén no conxunto da provincia de Lugo e de Galicia”.
Anxo M. Lorenzo, pola súa banda referiuse aos últimos datos do Comercio Interior do Libro en España que falan dun incremento de máis do 8% da edición en galego o ano pasado “e tamén un aumento nas vendas de libros en papel de case o 6%”. Referiuse tamén á “eficacia” das feiras do libro e lembrou as liñas de apoio incluídas no Plan de impulso ao libro galego para facilitar a transformación dixital, adecuarse ás novas realidades de consumo e crear e fidelizar lectores.
A XXIV Feira do Libro de Monforte de Lemos poderá visitarse ata o sábado 26 de agosto. As casetas estarán abertas de 11 a 14 horas e durante a tarde de 19 a 22 horas. Serán catro xornadas de actividades nas que o público asistente poderá gozar de presentacións de libros e sinaturas das obras por parte dos seus autores.
As casetas presentes nesta edición son as de A Gata Tola (Santiago de Compostela), Libraría Cartabón (Vigo), A Librería da Proencia (Sober), o Servizo de Publicacións da Deputación de Lugo, Librería Agrasar (Monforte) e Librería Entre Libros (Monforte).
