Na ruta, de pouco máis de 10 quilómetros, contouse como relatores cos profesores e escritores Celia Díaz e Xosé Estevez, dous intelectuais moi ligados e comprometidos coas terras quiroguesas, e con Ramón Vila, Director dos Museos de Quiroga e un dos artífices desta iniciativa turística-cultural. Tampouco faltou a música, contando coa colaboración de Xavier Blanco, da Fundación Legar, que amenizou as paradas tocando diferentes instrumentos.
Durante a ruta realizáronse paradas naqueles emprazamentos vinculados dalgunha maneira con sete escritores: Pura e Dora Vázquez que viviron en Quiroga sendo nenas; Ernesto Guerra da Cal, con familia quiroguesa, que viviu coa súa tía en varios lugares da vila durante a súa nenez e adolescencia; Eduardo Moreiras, autor que naceu en Quiroga e volveu con frecuencia a estas terras para explorar vales, ríos e montañas; Luis Losada, intelectual nacido en San Vitoiro do século XVIII; o senlleiro Ánxel Fole que residiu na Veiguiña para protexer a súa integridade despois da Guerra Civil; e a avoa de Manuel María era do Hospital, ademais fixo fondas amizades nestas terras.
Arriba de 60 persoas estiveron presentes nesta ruta literaria, e entre os participantes estiveron o Alcalde de Quiroga, José Luis Rivera, e o Primeiro Tenente de Alcalde e concelleiro de Turismo, Vicente Parra.
