Dentro do Ciclo da Rede de Teatros e Auditorios da Xunta, este xoves 5 de outubro, chega Gloria Nacional, da compañía Teatro do Noroeste, obra escrita e dirixida por Eduardo Alonso e interpretada por Miguel Pernas, Luma Gómez e Manuela Varela.

A obra conta a historia de Uxío Rodas, escultor e pintor duns 60 anos, considerado polos seus contemporáneos unha auténtica “gloria nacional”. As súas esculturas están nos mellores museos internacionais e ten sobre as súas costas unha longa e importante carreira de creador honesto e impoñente, con exposicións e grandes ventas en todos os países do mundo.

Agora atopámolo no seu estudio construído nunha antiga granxa de vacas, apartado da civilización, tentando concentrarse no seu traballo máis importante, encargado polo goberno do seu país. O encontro das tres mentalidades: a de Uxío, na crise existencial de non retorno; a de Maribel, a xuventude executiva da nova realidade e a de Carme, a sabedoría de quen o ten vivido todo, xeran, nesta obra, unha comedia de profundo contido social.

A seguinte obra do ciclo de teatro para adultos será Unha inimiga do pobo da compañía Talía Teatro que terá lugar o xoves, 26 de outubro, no Edificio Multiusos ás 20:15 h, sendo o prezo da entrada xeral de 5 euros e de 3 euros para estudantes, desempregados e xubilados.