Esta actividade é continuación dun curso desenvolto o pasado ano para abordar estratexias, crear a folla de ruta para programar co obxecto de buscar a sustentabilidade como museoloxía social. Nesta ocasión avalíase o impacto na comunidade das actividades desenvoltas, “Este curso de formación pretende avaliar todo o que facemos desde os museos. Todo son aprendizaxes en movemento, polo tanto todo é educación. É a ferramenta que nos permitiu traballar a accesibilidade, a integración, a inclusión, a igualdade… co obxectivo da sustentabilidade”, destaca Encarna Lago, xerente da Rede Museística Provincial de Lugo.

A xornada estará guiada por Eloísa Pérez Santos, profesora de avaliación psicolóxica da Universidade Complutense de Madrid e investigadora de públicos de museos, que tratará cuestións como a humanización dos datos, a importancia de obxectivos e indicadores ben definidos,… Todo para reflexionar sobre o museo que se quere conseguir.

Xornadas Pedagóxicas en Tor

Este tipo de actividades fanse en dúas modalidades, presencial e online; unha proposta de coñecemento aberto dirixida a toda a comunidade iberoamericana da Rede Museística, que este ano xira arredor do lema “Museos, sustentabilidade e benestar”. A Rede abre así a súa comunidade de aprendizaxe e incorporarse a ela permite acceder ás propostas do programa Estratexias de Museoloxía Social 2023, un proceso de reflexión e aprendizaxe colectiva coordinado desde BenCuriosa – Implementa Cultura Accesible.

Acudirán ao Museo Pazo de Tor unha vintena de participantes, o aforo é limitado por cuestións de conservación patrimonial; pero online coa participación de Iberoamérica súmanse xa 700 participantes entre esta edición e a do pasado ano.

“Queremos avaliar o impacto da museoloxía social, medir a transformación social que se fai cos programas e proxectos que se levan a cabo na RMPL. Conseguimos que as persoas con discapacidade traballen, conseguimos traballar coa comunidade emigrante, coas mulleres rurais,… todos os eixos das desigualdades de modo transversal. A museoloxía social é un camiño, un proceso, e queremos saber se o estamos facendo ben”, sinala Encarna Lago.

Este tipo de xornadas encádranse ademais na proxección externa que desenvolve a RMPL neste final de ano para dar a coñecer as actividades de sustentabilidade que levan a cabo máis alá dos museos.