Hai tres anos nacía o proxecto ‘A Memoria do Piñeiro’ na aldea de Piñeiros, parroquia de Castroncelos, no Concello da Pobra do Brollón. Trátase, en palabras de Olga Novo, “dun proxecto de cultura emocional que xira arredor do recordo da veciñanza dos pequenos lugares da parroquia de Castroncelos”. Un evento que se desenvolve a carón dun gran piñeiro que serviu na Idade Media de lugar de xuntanza comunal, e que se converte, recollendo as palabras da intelectual de Vilarmao, nun “espazo de convivio cultural”.
Impulsado desde o seu comezo por Mónica, veciña de Piñeiros, conta coa colaboración desinteresada de diferentes autores, autoras e artistas –creadores e creadoras libres– que expresan a súa obra literaria e/ou musical dedicada á memoria baixo a inmensa e máxica árbore. Por este natural escenario pasaron estes anos intelectuais e artistas como Lois Diéguez, Luis Caruncho, o Bruxo Queiman, Xico de Carinho, Xurxo Ayán ou Su Garrido.
Este ano formaron parte do cartel o pasado sábado 24 de agosto: Sèchu Sende, Olga Novo, As Moíñas e Eugenia Sanmartín. Acabou participando máis xente, habendo lugar para as regueifas e os brindos, e tamén para unha demostración de fiado de la.
