A exposición “Galegoza. A canción en galego” é unha iniciativa que chega a dez centros de Secundaria da provincia de Lugo grazas á Vicepresidencia da Deputación de Lugo. Os obxectivos principais son dar a coñecer ao público máis novo a amplísima oferta musical no noso idioma e lembrar o momento excepcional que está a vivir o panorama musical actual.
O programa artéllase arredor dunha exposición que repasa o percorrido histórico da música en galego desde os anos sesenta, desde a música tradicional e a canción protesta do século pasado ata a variedade de estilos nos que se fai música en galego nos últimos anos: ritmos tradicionais revisados e actualizados, pop, rock, canción de autoría, experimentación e electrónica, músicas urbanas, hip hop ou rap.
Os 16 paneis que forman a mostra, comisariada por Pepe Cunha e deseñada pola directora de arte Belén Freijeiro, describen esta evolución a través das bandas e solistas máis representativas e incorporan códigos QR cunha ligazón directa á lista de reprodución Galegoza para poder escoitalas.
UNHA MOSTRA ITINERANTE
A presentación da exposición tivo lugar o pasado mes de setembro no IES Xograr Afonso de Sarria, lugar onde permanecerá ata este 23 de outubro. O vicepresidente da Deputación de Lugo Efrén Castro e a deputada de Cultura Iria Castro estiveron presentes no acto convidando ao estudantado a documentarse destacando a potencialidade das cancións en galego como ferramentas para a dinamización da lingua. Subliñaron, ademais, o momento excepcional que está a vivir a música en galego e as facilidades de escoita que ofrecen actualmente as novas tecnoloxías.
A partir do 23 de outubro a exposición chegará despois a outros nove centros espallados pola provincia. Entre eles, están o IES Lama das Quendas, en Chantada, o IES Río Cabe de Monforte e o IES de Quiroga.
Cada centro contará para a inauguración da mostra cunha charla de Pepe Cunha e cunha unidade didáctica arredor da exposición para facilitarlle o traballo ao profesorado e introducir a música en galego noutros proxectos.
